O pasado 30 de novembro o Concello e a veciñanza de Rianxo renderon unha sentida homenaxe a dous dos seus artistas máis queridos: Xosé Romero e Maruxa dos Rosales, os integrantes de Os Rosales.
A homenaxe desenvolveuse ao longo de toda a xornada en diferentes actividades, comezando arredor das 11.00 cun acto institucional e público de nomeamento de Fillos Predilectos de Rianxo a don Xosé Romero e dona Eclíptica Orbita “Maruxa dos Rosales” polo “seu importante labor no eido da música tradicional galega, e por ter destacado na defensa da cultura galega e dos valores democráticos”, segundo sinalou o alcalde Julián Bustelo na súa intervención.
Foi nunha Casa Consistorial ateigada de veciños, familiares de Xosé e Maruxa e membros do equipo do Goberno e da Corporación.
Máis tarde celebrouse unha sesión vermú a cargo de Carapaus, na carpa habilitada a carón do Auditorio Municipal. Ás 14.00 horas comezou un xantar popular na carpa do Auditorio e logo da comida, ás 17.00 horas, celebrouse outro acto de celebración con intervencións de amigos, familiares e dos grupos Amaiante, Río de Anxo e Silvaredonda. O acto pecharase interpretando A Camposa.
Os Rosales é un mítico e histórico dúo-grupo de folk galego creado na parroquia de Asados, en Rianxo, na década dos 1950. Está formado por Xosé Romero (gaita) e Maruxa (voz e bombo).
