O Concello de Padrón iniciou hoxe o reparto dos Bonos Padrón na planta baixa da Escola Municipal de Música, nunha campaña enfocada a impulsar o consumo local durante as festas do Nadal. A acollida foi moi elevada desde primeira hora: ás 15.00 horas xa se entregaran 1.258 bonos, unha cifra que confirma o interese da veciñanza nesta medida de apoio ao comercio de proximidade.
O alcalde, Anxo Arca, acompañado das concelleiras Chus Campos e Laura Horta, visitou o punto de distribución para coñecer de primeira man o desenvolvemento da xornada. A pesar dalgúns momentos de agarda debido á elevada afluencia, o proceso transcorreu con normalidade e axilidade, atendéndose todas as solicitudes sen incidencias.
O reparto continuará ata esgotar as 2.000 unidades dispoñibles, cun prazo máximo ata o mércores 3 de decembro, en horario ininterrompido de 11.00 a 18.00 horas. Para recoller os bonos é necesario presentar o DNI físico, e cada persoa empadroada pode retirar ata dúas unidades.
A campaña conta coa participación de 65 establecementos locais —entre comercios, hostalaría e aloxamentos— nos que os bonos poden empregarse como desconto de 10 euros en compras iguais ou superiores a 20 euros, ata o 31 de decembro.
O Concello destaca que esta iniciativa busca dinamizar o comercio padronés durante o Nadal, apoiar ao tecido empresarial e ofrecer un incentivo directo á cidadanía para realizar as súas compras no municipio.
A lista completa de establecementos adheridos e toda a información sobre o funcionamento dos bonos está dispoñible en bonospadron.gal e na web municipal.
