A Xunta destaca o valor literario e humano de Neira Vilas na presentación do epistolario co profesor Alonso Montero
O secretario xeral da Lingua, Valentín García, participou esta mañá na presentación do libro Correspondencia 1965-2014, publicado pola Editorial Galaxia, unha obra que recolle medio século de intercambio epistolar entre dous referentes da intelectualidade galega: Xosé Neira Vilas e Xesús Alonso Montero. O acto celebrouse coincidindo co décimo aniversario do pasamento do autor de Memorias dun neno labrego.
García salientou “a posta en valor dun dos autores galegos máis universais”, subliñando “a importancia dun intelectual que contou a historia de Galicia desde a aldea e que se autodenominaba un xornaleiro da lingua”. Destacou tamén que este epistolario revela “o compromiso dos escritores co galego no seu eido privado” e contribúe a “fortalecer a nosa lingua”.
Na presentación estiveron tamén presentes Fernando Redondo Neira, Xesús Alonso Montero e Xosé Manuel Soutullo.
Nova versión teatral de Memorias dun neno labrego
No marco deste décimo aniversario, o Centro Dramático Galego avanza xa nos ensaios da nova produción de Memorias dun neno labrego, dirixida por Cándido Pazo. A adaptación, realizada en colaboración coa compañía Contraproducións, levarase á escena no Salón Teatro de Santiago de Compostela do 8 ao 25 de xaneiro de 2026.
Trátase dunha homenaxe escénica á obra máis emblemática de Neira Vilas, que continúa a ser un alicerce fundamental da literatura galega e unha referencia para sucesivas xeracións de lectores.
