O director de Turismo de Galicia, Xosé Merelles, e o alcalde de Rianxo e presidente da Mancomunidade de Municipios Barbanza Arousa, Julián Bustelo, mantiveron un encontro no que abordaron, entre outros asuntos, a importancia de potenciar os recursos turísticos e patrimoniais da comarca, como o Hórreo do Araño, o máis longo e de maior capacidade de toda Galicia, que se consolidou como un dos principais atractivos para os visitantes.
Ambos coincidiron na riqueza paisaxística e cultural deste territorio, que queda patente en espazos como o Miradoiro da Muralla, situado a 678 metros de altura e cunha ampla vista sobre a ría de Arousa, Muros-Noia e mesmo terras compostelás.
O miradoiro dispón dunha plataforma de madeira na cima do Monte Picudo, desde a que se contempla o núcleo rianxeiro e se accede ao pesqueiro de O Araño e á aldea de Burés a través da coñecida “Pista da Pedra dos Concellos”, punto de unión entre os municipios de Rianxo, Lousame e Rois.
