Un aparatoso accidente rexistrado esta tarde en Santiago deixou ferida grave a unha muller de 47 anos, veciña da cidade, que circulaba pola estrada SC-30 —o novo enlace orbital— cando perdeu o control do seu vehículo ao chegar a unha rotonda.
O coche impactou contra a barreira de protección e caeu por un desnivel de arredor de 30 metros ata a autovía A-54, que conecta Santiago con Lugo. Un vehículo que circulaba pola autovía conseguiu esquivar o impacto, mentres que unha ambulancia que viña detrás asistiu á condutora desde o primeiro momento, atrapada no interior do turismo.
Os bombeiros tiveron que intervir para excarcerar á vítima, que foi trasladada en estado grave ao Hospital Universitario de Santiago.
A Dirección de Tráfico cortou durante varias horas a circulación en dirección a Santiago, á altura do quilómetro 91 da A-54, ata que se retirou o vehículo accidentado. As causas do sinistro están a ser investigadas.
