Máis de un cento de persoas xa participaron na enquisa cidadá impulsada polo Concello de Rianxo para acadar o mellor servizo posíbel de recollida do lixo e limpeza viaria.
Esta iniciativa enmárcase no proceso de renovación completa do servizo que pretende levar a cabo o Executivo de Julián Bustelo nos vindeiros meses. “Antes do remate da lexislatura queremos ter renovado por completo o servizo, mellorando o parque de colectores, mellorando as rutas de recollida e incorporando as esixencias da normativa estatal aprobada recentemente”, sinalou o alcalde.
A enquisa foi posta en marcha para, en palabras do Concello, “saber máis sobre os hábitos, coñecementos e necesidades da cidadanía en relación con este servizo”.
“Será un intenso proceso para dotarnos dun servizo eficaz e eficiente, tanto no eido económico como no eido da sustentabilidade, no que ademais queremos contar coa participación directa da veciñanza”, engadiu Bustelo, apuntando que a enquisa xa está dispoñíbel para a cidadanía na Rede.
