O Concello de Muros acolle o próximo martes, día 18 de novembro, a presentación do libro As tolas que non o eran. Mulleres no manicomio de Conxo. 1885-1936, coa presenza da súa autora, Carmen V. Valiña.
A actividade forma parte da programación municipal polo 25N (Día pola Erradicación da Violencia contra as Mulleres) e será no Local Social de Surribos (Abelleira) ás 19:00 horas!
“Este é un libro sobre as que nunca importaron. As tolas que non o eran, rachando as follas co único que non puideron quitarlles: a coraxe para berrar que a historia non sempre é como nola contan”, recolle a sinopse de Editorial Galaxia sobre o libro.
A concelleira de Muller e Igualdade de Muros, Maruxa Martínez, convida á veciñanza “a pasar unha tarde diferente e ser partícipes desa historia que non debemos esquecer”, lembrando “a importancia de aprender do pasado e non dar pasos cara atrás na lacra da violencia machista”.
Sinopse
Este é un libro sobre as que nunca importaron. As tolas que non o eran, rachando as follas co único que non puideron quitarlles: a coraxe para berrar que a historia non sempre é como nola contan.
As internas no manicomio de Conxo entre 1885 e 1936 tiñan todos os ingredientes que condenan a unha persoa á marxe: mulleres, aldeás, pobres, analfabetas, rebeldes. Pero as súas vidas gardan a potencia do fondamente humano: a subversión de Amalia fumando cigarros rubios no vapor Habana; a carta que María envía á súa filla despois dun Nadal no inferno; a mirada sen esperanza de Elena, a quen imaxinas amasando nas mans da neta e non na cesta de costura dun manicomio.
En cada relato emerxe un escintileo que nos interpela: “Estou aquí e quero que me escoites”. Todas elas regaláronnos a súa mirada a través das paredes do manicomio e as súas palabras para escoitar a voz das vencidas. Porque o que queda nas cunetas da historia merece ser contado.
