O Concello de Dodro celebrou o seu pleno ordinario de novembro, no que a maior parte dos puntos da orde do día estiveron centrados na actualización das taxas municipais de distintos servizos.
PP, Unidade Veciñal de Dodro e Xente de Dodro tumbaron a suba da taxa do lixo obrigando ao concello a incumprir a lei. O pleno si aprobou o recoñecemento de Moncho Reboiras como fillo predilecto.
O goberno local logrou sacar adiante, cos votos de PSdeG, Unidade Veciñal de Dodro (UVD) e BNG, a suba das taxas de abastecemento, acometida e saneamento, unha medida que, segundo defenderon, responde á actualización anual do IPC recollida no contrato vixente.
Os grupos do PP e Xente de Dodro votaron en contra, o que lles valeu críticas do resto de forzas, que os acusaron de “populismo” e de incumprir un contrato “asinado por eles mesmos no seu día”.
Tamén se aprobou, cos mesmos apoios, o incremento das taxas dos servizos deportivos, proposta que novamente rexeitaron PP e Xente de Dodro. Desde Unidade Veciñal suxeriron estudar a creación dun abono reducido, iniciativa apoiada polo BNG, pero ambos os grupos insistiron en que “se se queren servizos, hai que mantelos”.
O alcalde, Xabier Castro, lembroulles ás formacións da oposición que o pavillón municipal foi inaugurado por eles, polo que deberían comprender que é necesario “usalo e mantelo”. Engadiu ademais que “esta taxa leva sen actualizarse desde 2014 e, aínda coa suba, o servizo segue a ser deficitario en 45.000 euros; isto si é subvencionar o deporte”.
Rexeitada a suba da taxa do lixo
A proposta de incremento da taxa do lixo, similar á que están aprobando a maioría dos concellos galegos, non prosperou ao contar cos votos en contra de PP, Xente de Dodro e UVD.
Unidade Veciñal, que apoiara as anteriores actualizacións, xustificou o seu cambio de voto en que o goberno “debería telo consensuado con eles”.
O alcalde e o voceiro socialista, Ramón Abuín, advertiron de que o rexeitamento supón incumprir a normativa vixente, xa que o aumento era “obrigado polo incremento das taxas de SOGAMA e pola nova lei que impide que a recollida de lixo sexa un servizo deficitario”. A negativa pode, segundo explicaron, acarretar consecuencias legais e económicas para o Concello.
Moncho Reboiras, fillo predilecto de Dodro
O pleno aprobou tamén por maioría absoluta declarar fillo predilecto a título póstumo a Xosé Ramón Reboiras Noia (Moncho Reboiras), ao cumprirse 50 anos do seu falecemento.
Natural de Imo, na parroquia de San Xoán de Laíño, Reboiras foi sindicalista e opositor á ditadura franquista, militante da UPG e impulsor da Fronte Cultural Galega.
Tras traballar en Astano (Ferrol), foi asasinado pola policía franquista en agosto de 1975, un suceso que provocou o exilio de moitos compañeiros a Portugal, recén saída da Revolución dos Caraveis.
O Concello de Dodro anunciou que organizará proximamente un acto de homenaxe no que se fará entrega da distinción á súa familia.
