Proseguen as representacións da II Mostra de Teatro de Porto do Son, organizada polo Concello: un ciclo escénico que traerá sete obras de gran nivel á Casa da Cultura entre outubro e novembro (todas ás 21.00 horas). Este pasado 8 de novembro a Mostra acadou un importante éxito de público coa representación, na Casa da Cultura de Porto do Son, da Máis Saaabor!, unha proposta cómica para público infantil e familiar dirixida por Avelino González en torno ao mundo da gastronomía e a alimentación saudable. Máis Saaabor! coproducida Culturactiva S. Coop. Galega e Félix Rodríguez, mestura música en directo, maxia, humor, moito ritmo e participación do público.
A actividade formou parte da programación de Cultura da Deputación da Coruña
Máis axenda
A axenda da II Mostra de Teatro comezou o 18 de outubro con Vicio houbo sempre, unha peza de narración oral protagonizada por Atenea García, que recolle historias reais de mulleres maiores de 80 anos sobre o desexo, o pracer e a vida.
O 25 de outubro foi a quenda de Golpes, da compañía aAntena, centrada na historia de Pamela e a aprendizaxe dunha relación que non debía vivir. O 1 de novembro, Gallaecia Eventos presentou Cabaré Climático, e o 8 de novembro, foi a quenda de Máis saaabor!
O 15 de novembro, Talía Teatro representará Un deus salvaxe. O 22 de novembro, o grupo local Mimarte presentará Nais en apuros.
A clausura será o 29 de novembro coa comedia D.E.P, de Malasombra.
As obras Vicio houbo sempre, Golpes e Nais en apuros son de entrada libre, mentres que as restantes terán un prezo de 4 euros. As entradas están dispoñíbeis dende o 14 de outubro na Oficina de Cultura (de luns a venres, de 8:00 a 15:00 horas) ou o mesmo día da función, só con pagamento mediante tarxeta bancaria.
Un deus salvaxe
Un deus salvaxe, a peza que se representa este 15 de novembro (sábado) en Porto do Son, é un espectáculo para público adulto de 70 minutos de duración, abeirado ao Programa Rede Cultural da Deputación da Coruña. Escrita por Yasmina Reza, a obra ponnos na pel de dous matrimonios, adultos e civilizados, que teñen un encontro para resolver un incidente protagonizado polos seus fillos pequenos: un deles partiulle dous dentes ao outro nunha pelexa no parque. Nada que uns pais civilizados non poidan resolver. Con este argumento, Yasmina Reza compón unha sátira da sociedade contemporánea e debulla con humor as relacións de parella, a educación, a competitividade,… pero, sobre todo, o exceso de corrección política.
