O Camiño da Ría de Muros Noia acadou unha gran acollida no sexto Fórum do Camiño de Santiago “Fairway”, que se clausura hoxe na Cidade da Cultura de Galicia. Trátase dun encontro profesional no que a Asociación de Concellos do Camiño da Ría de Muros Noia destacou por dar a coñecer un novo concepto de ruta xacobea: o Camiño Marítimo da Ría de Muros Noia, integrado ademais na prestixiosa Vía Querinissima, itinerario cultural europeo en proceso de recoñecemento oficial.
O presidente da Asociación, Luís Oujo, subliñou “o respaldo internacional que supuxo a presenza en Fairway de representantes de tres delegacións internacionais de Italia, Noruega e Suecia, que viñeron promover a candidatura da Vía Querinissima como Itinerario Cultural Europeo e poñer en valor que este itinerario, que implica a máis dunha decena de países, conte cun tramo do Camiño de Santiago que permite obter a Compostela”.
Pola súa parte, o responsable de comunicación da Asociación, José Antonio Marcote, destacou “o gran interese espertado polo Camiño Marítimo da Ría de Muros Noia entre os máis de corenta touroperadores, axencias de viaxes e centrais de reservas especializadas no Camiño de Santiago a nivel internacional presentes en Fairway”.
Segundo Marcote, “uns poñen o énfase na orixinalidade da proposta, outros valoran a recuperación dunha forma de peregrinación a vela propia doutros séculos, e tamén hai quen se interesa pola vinculación da nosa ruta cun itinerario europeo como é a Vía Querinissima”.
A integración deste tramo galego na ruta europea foi reforzada coa visita dunha ampla delegación internacional do Véneto (Italia), Nordland (Noruega) e Västra Götaland (Suecia), acompañada por representantes da Xunta de Galicia, da Deputación da Coruña e da propia Asociación de Concellos do Camiño da Ría de Muros Noia.
Durante o encontro, as delegacións coñeceron que o Camiño Marítimo da Ría de Muros Noia permite peregrinar a Santiago a través dunha ría e de portos cunha profunda tradición xacobea, especialmente o de Noia, que no seu momento foi coñecido como o Portus Apostoli de Compostela. A travesía lembra o percorrido de milleiros de peregrinos desde a Segunda Cruzada, entre eles o navegante veneciano Pietro Querini, en outubro de 1431.
Recoñecido oficialmente polo Cabido Catedralicio de Santiago, o itinerario permite obter a Compostela completando 100 millas náuticas en veleiro, selando a credencial do peregrino nos portos indicados e camiñando, cando menos, os 12 últimos quilómetros entre Bertamiráns e Santiago.
A Vía Querinissima é unha ruta marítima e terrestre que atravesa Creta, as costas de España e Portugal, e continúa por Noruega, Suecia, Inglaterra, Alemaña, Suíza e Austria, ata chegar a Venecia. O tramo galego deste itinerario está representado polo Camiño da Ría de Muros Noia, que gaña así proxección internacional como ruta xacobea de referencia.
