O Concello de Muros vén de aprobar en sesión plenaria ordinaria a desafectación da Escola de San Xosé, un inmóbel e de titularidade municipal que permanecía cedido á Xunta de Galicia mentres funcionou como centro educativo. Tras o peche da escola, o grupo de Goberno iniciará os trámites para recuperar plenamente a cesión e devolver o uso das instalacións ao Concello de Muros, o que permitirá empregar o edificio para novos proxectos municipais sen necesidade de solicitar autorización á actual Consellería de Educación.
Outro punto aprobado foi a declaración institucional con motivo do 25 de novembro, Día Internacional contra as Violencias Machistas. A corporación amosou o seu compromiso común fronte a esta lacra social, subliñando a responsabilidade das administracións públicas na prevención e na loita contra todas as formas de violencia exercida contra as mulleres.
O Concello lembra á veciñanza que as sesións plenarias son públicas e accesíbeis para todas as persoas, e que as videoactas poden consultarse na canle de YouTube do Concello de Muros.
