A palestina Hanan Kaoud, concelleira de Ramala (Cisxordania) e experta en xénero, visitará Muros esta semana.
A visita forma parte dunha actividade do Fondo Galego de Cooperación e Solidariedade, do que o Concello de Muros forma parte e onde está representado por Laura Rivadeneira.
O mércores 12 ás 17:00h no Local Social de Sorribos (Abelleira), celebrarase unha charla-café con Hanan Kaoud, que falará “da voz resiliente das mulleres palestinas” e conversará con todas as persoas asistentes.
“Será unha honra e un pracer ter en Muros a Hanan Kaoud, unha muller moi valente que é testemuña do xenocidio que sufre Palestina por parte de Israel”, asegurou a alcaldesa, María Lago, que convidou “a toda a veciñanza a escoitar e falar con Hanan”.
“Calquera pode imaxinar o difícil que é exercer a política en Palestina e sendo muller”, afirma Laura Rivadeneira, “polo que Hanan é un exemplo de dignidade e loita polos Dereitos Humanos”.
Hanan Kaoud forma parte das conferenciantes de Europa, África, América Latina e o Mediterráneo que interviron os días pasados no programa de Les Elegides de Mallorca.
María Lago e Laura Rivadeneira estiveron presentes neste foro a través do Fondo Galego de Cooperación e Solidariedade e tiveron a oportunidade de conversar con Hanan Kaoud da súa visita a Galicia e concello muradán.
