O Concello de Ribeira iniciou unha campaña de limpeza nos parques infantís do municipio co obxectivo de garantir a salubridade destes espazos de lecer, especialmente nestes meses nos que o mal tempo provoca que as zonas de caucho se ensucien con maior facilidade.
A alcaldesa, María Sampedro, explicou que os traballos comezaron polos parques con maior afluencia de nenos e nenas:
“Empezamos polos parques que aglutinan maior número de nenos e nenas para despois continuar polo resto do concello. Queremos que, dentro das posibilidades que nos deixa o inverno de saír ao exterior, teñan estas zonas en óptimas condicións”.
A brigada municipal centrou os seus labores nos últimos días no parque das Abesadas, e na vindeira semana está previsto que as tarefas de limpeza se trasladen ao parque de García Bayón.
Dende o Concello subliñan que esta actuación forma parte das accións periódicas de mantemento dos espazos públicos, co propósito de ofrecer ás familias lugares seguros e limpos para o xogo e o desfrute da infancia.
