Este xoves o auditorio da biblioteca municipal da Pobra do Caramiñal acolleu o acto público de presentación do novo número da revista FORO GALICIA E VALLE-INCLÁN. Publicación de estudos sobre Ramón del Valle-Inclán, editada pola entidade asociativa do mesmo nome que preside o investigador galego Xaquín del Valle-Inclán Alsina, neto do escritor e director editorial da publicación.
Foro Galicia e Valle-Inclán é un proxecto de carácter integrador que naceu co propósito de democratizar a investigación e o coñecemento arredor da vida, a obra e a xenialidade literaria de Ramón del Valle-Inclán, o autor galego máis internacional, con textos traducidos a máis de 35 idiomas. A revista procura ofrecer unha visión ampla do creador vilanovés, poñendo en valor a súa relación con Galicia e o seu diálogo coa cultura e as letras doutros países.
O sumario deste novo exemplar (Ano 2, número 2) inclúe traballos de investigación inéditos e ensaios de Víctor Viana e Ángel Varela —entre eles, As obras de Valle-Inclán en Rusia—, así como un estudo de Xaquín del Valle-Inclán titulado Valle-Inclán e o sindicalismo de autores.
A revista preséntase en edición bilingüe galego-castelán, co apoio da Dirección Xeral de Cultura da Xunta de Galicia, e conta coa tradución ao galego da lingüista Rocío Viéitez Ferro.
O proxecto promove, ademais, actos públicos de difusión en distintas localidades galegas, co obxectivo de achegar o pensamento e o legado de Valle-Inclán á cidadanía máis aló dos ámbitos académicos. Este número xa foi presentado en Santiago de Compostela (Museo Fundación Eugenio Granell) e A Coruña (Casa Museo Casares Quiroga), e hoxe chega á Pobra do Caramiñal, no marco da 27ª edición das Xornadas de Homenaxe a Valle-Inclán organizadas polo Museo Valle-Inclán de Cambados.
Están tamén previstas novas presentacións en Vigo, Ferrol e Ourense, cuxas datas se confirmarán nas vindeiras semanas.
