A libraría ULA Libraría Social, con sede na rúa da Capela de Outes e impulsada por Maitane Vicente, vai acoller este 1 de novembro unha nova entrega dos cafés-conversa para mulleres de diferentes xeracións.
A sesión dará comezo ás 11.30 horas e será, segundo explican dende a libraría, “unha actividade de visibilización da morte xestacional, perinatal e neonatal no mes da concienciación sobre este dó esquecido”.
O programa de actividades inclúe unha lectura da man da autora María Besteiros do seu libro Penélope Tece, álbum ilustrado sobre o dó (duelo) perinatal. A axenda tamén inclúe a elaboración colectiva de recordos, entre todas as participantes, con diferentes materiais.
As inscricións cómpre facelas na propia Libraría ULA ou a través do teléfono 659 177 829.
