A Asociación Amas de Casa de Ribeira, coa colaboración do Concello, celebrou na tarde de hoxe un acto de homenaxe ás persoas falecidas a causa da COVID-19 e de agarimo para as súas familias. A cita, desenvolvida na praza de España, xunto ao monumento erixido en lembranza das vítimas, reuniu a veciños e veciñas, membros da Corporación municipal e representantes do tecido asociativo local.
O acto estivo marcado pola emoción e o respecto. Houbo palabras de recordo, un minuto de silencio e unha ofrenda floral ante a escultura, nun ambiente de silencio e unión que fixo visible o sentir colectivo dun pobo que non esquece.
A alcaldesa de Ribeira, María Sampedro, subliñou durante a súa intervención que este acto “é a mostra de afecto, recordo e respecto de todo un pobo ás vítimas dun dos episodios máis tristes e abrumadores da nosa historia recente”. Engadiu que “foi moi duro ver como cada día aumentaban os contaxios e os falecementos; pero detrás das cifras hai persoas, familias, amizades e veciños. Esta homenaxe vai dirixida a todas aquelas persoas que non puideron ser despedidas polos seus seres queridos, e tamén ás familias que tiveron que afrontar o duelo en soidade”.
A rexedora tamén quixo recoñecer o labor do persoal sanitario e dos profesionais esenciais que, en momentos de máxima dificultade, “garantiron a atención e os servizos básicos á cidadanía con entrega e valentía”.
Pola súa parte, a presidenta da Asociación Amas de Casa de Ribeira, Puri Cores, amosou a emoción de lembrar aqueles meses de pandemia e evocou as imaxes “dos féretros nos medios e das familias que non puideron despedir aos seus seres queridos”. Cores lembrou que a entidade impulsou en outubro de 2021 a creación deste monumento “para manter viva a memoria das vítimas e facer cada ano este acto dende a humildade, o cariño e o respecto”, converténdose así Ribeira no primeiro municipio en lembrar oficialmente a todas as vítimas da COVID-19.
