O Concello de Rianxo confirmou que vai dar acollida en decembro á vindeira edición (a VIII) da Mostra Internacional de Cinema Documental Mares da Fin do Mundo, un evento creativo e social comprometido co medio marítimo e co sector pesqueiro, que busca crear conciencia sobre a necesidade de coidar dun dos nosos recursos naturais máis valiosos: o mar.
Entre o 10 e o 14 de decembro o Auditorio de Rianxo acollerá 45 proxeccións e desenvolveranse diferentes actividades paralelas relativas ao mar e á pesca.
Na súa anterior edición a mostra desenvolveuse en Ribeira e, previamente, no concello de Outes.
O evento está organizado pola Asociación Cultural Mares da Fin do Mundo e patrocinado pola Deputación da Coruña, a Xunta de Galicia e, neste caso, o Concello de Rianxo.
A Mostra MDFDM é asinante do Pacto Cultura Sustentábel, en liña coa Axenda 2030 e cos Obxectivos de Desenvolvemento Sustentábel (ODS).
