O grupo municipal de Compromiso Outes solicitou formalmente ao alcalde Francisco Calo a retirada inmediata de todas as competencias delegadas ao concelleiro Antonio Caamaño, despois de que o Concello recibise a resolución da Comisión Federal de Ética e Garantías do PSOE que fai firme a súa expulsión do partido.
Segundo o comunicado da formación, a firmeza da expulsión implica que Caamaño pasa a ser concelleiro non adscrito, polo que debe abandonar o Grupo Mixto no que figuraba ata agora. Ademais, lembran que coa confirmación da sanción, o edil adquire oficialmente a condición de tránsfuga, ao ter apoiado a moción de censura que fixo alcalde ao popular Francisco Calo “en contra do criterio de todos os órganos do PSdeG-PSOE”.
Compromiso Outes sostén que, segundo a normativa vixente, un concelleiro nesta situación non pode formar parte do goberno nin recibir delegacións, xa que “non debe mellorar a súa posición respecto ao momento no que asinou a moción de censura”. Recordan tamén que Caamaño abandonara o grupo de goberno días antes da presentación da moción, anunciando a súa intención de pasar á oposición.
Fontes da formación subliñaron que o informe da secretaría municipal é claro ao respecto: “O señor Calo debe cesar de inmediato ao concelleiro tránsfuga. Do contrario, estaría desobedecendo un informe dos servizos xurídicos do concello, algo moi serio”, advertiron.
