CONGALSA, empresa especializada en alimentación con sede no Barbanza, acaba de renovar o seu compromiso de patrocinio cunha das entidades
deportivas máis emblemáticas da comarca: o Club de Remo da Pobra (Club de Remo Puebla). Segundo lembrou a firma con sede no Polígono da Tomada, “a relación entre a empresa e esta organización vén de lonxe, xa que CONGALSA leva desde o ano 2008 colaborando cun club cuxas instalacións sufriron a principios deste ano un aparatoso incendio”.
Para poñer en valor a renovación da colaboración, Isabel Cañas (directora de Relacións Externas da compañía) e Irene Souto (adxunta á Dirección deste departamento) mantiveron un encontro con Emilio Dieste, presidente do Club de Remo. Durante a visita, puxéronse en valor diversas accións de cooperación extraordinarias que ambas as organizacións mantiveron no tempo. Así, durante a pandemia e a pedimento do Club de Remo, CONGALSA dispensou tests para detección da COVID aos seus integrantes. Por outra banda, o equipo directivo da empresa gozou dunha xornada outdoor na que recibiu nocións de remo por parte de membros do equipo profesional do club.
Axuda extraordinaria durante o incendio
No principio do ano, CONGALSA atendeu a petición do club e realizou unha doazón extraordinaria para axudalo a paliar os danos ocasionados polo incendio. En palabras de Isabel Cañas, “a entidade recibiu apoio económico, material e loxístico nunha onda de solidariedade, en xaneiro, con axuda procedente de diversos puntos de España, o que demostra o arraigamento e a estima que xera o seu traballo”.
A alianza de CONGALSA co Club de Remo da Pobra, engadiu, evidencia o apoio ao deporte base e ás organizacións que o promoven na comarca do Barbanza. “Apostamos por apoiar o esforzo dos nosos deportistas porque desde CONGALSA compartimos os valores de esforzo, traballo en equipo e
superación que o deporte transmite”, destaca a directora de Relacións Externas da compañía.
A renovación da colaboración reafirma, pois, o compromiso de CONGALSA co tecido social e deportivo da comarca, fortalecendo unha relación baseada na cooperación e o apoio mutuo. “A nosa firma seguirá acompañando ao Club de Remo Puebla nos seus próximos retos, contribuíndo a que
o deporte siga sendo un motor de cohesión e desenvolvemento para toda a comunidade local”, finalizou Cañas.
