A deputada de Emprego, Industria e Medio Ambiente, Rosa Ana García, e o alcalde de Boiro, José Ramón Romero, inauguraron en Boiro a exposición Golfiños na Proa, desenvolvida pola Coordinadora para o Estudo dos Mamíferos Mariños (CEMMA) e coa que se pretende difundir a diversidade de cetáceos e outras especies que poboan a costa galega.
A deputada aproveitou a súa intervención para concienciar sobre a importancia de protexer o medio mariño e as nosas costas, “especialmente a ría de Arousa, porque é un tesouro de biodeversidade mariña”, e fixo especial fincapé nas “especies como a toniña ibérica, un mamífero mariño que se atopa actualmente en perigo de extinción a pesar de ter en Galicia a maior poboación de toda a costa ibérica”.
“Con iniciativas coma esta exposición reforzamos o noso compromiso coa educación ambiental e a conservación do noso valioso patrimonio natural”, afirmou a deputada.
O alcalde de Boiro destacou tamén o valor educativo e de concienciación ambiental da exposición, que visitarán nas vindeiras semanas os escolares boirenses, que contarán coas explicacións dos técnicos do CEMMA.
A exposición
A mostra Golfiños na Proa consta de diversos paneis informativos dos cetáceos e mamíferos mariños de Galicia, así como de varios restos óseos de cetáceos, lobos mariños e tartarugas e poderá visitarse ata o día 4 de novembro no vestíbulo da Casa Consistorial.
Así mesmo, a Deputación da Coruña pon a disposición dos centros de Educación Primaria do Concello de Boiro a posibilidade de levar a cabo diversas visitas guiadas coa finalidade de achegar aos nenos e nenas a fauna da costa galega.
