Galicia continuará este domingo 12, Festa da Virxe do Pilar e Festa Nacional, baixo a influencia das altas presións, aínda que con presenza de aire frío en altura, o que deixará unha xornada xeralmente tranquila pero con algunha inestabilidade localizada.
Durante a mañá, formaranse néboas nas comarcas do interior, que irán desaparecendo co paso das horas, deixando paso a ceos abertos e con bo tempo en xeral. A partir do mediodía, agárdase o crecemento de nubes de evolución na metade sur.
As temperaturas mínimas subirán lixeiramente, mentres que as máximas se manterán sen cambios significativos (25 a 28 graos). O vento soprará frouxo do leste-nordés, con intensidade moderada no litoral norte.
O noso mar; Vento do nordés á mañá e á noite e do noroeste á tarde, forza 1 a 2 á mañá e á noite e 2 a 3 á tarde. Mar rizado á mañá e á noite e mar ovellado á tarde. Visibilidade boa. Mar de fondo do noroeste, con ondas de 0.5 a 1 metros.
