Este martes 7 de outubro de 2025, sobre as 19:10 horas, axentes de servizo da Policía Local de Rianxo procederon no lugar do Pazo (Rianxo) á interceptación dun turismo que ía conducido por unha muller residente na localidade de Ribeira (A Coruña), ao detectárense infraccións relativas á documentación do vehículo. No transcurso da actuación policial tamén se procedeu a efectuar un rexistro do interior do vehículo, así como tamén corporal da súa condutora, participando nas referidas actuacións unha patrulla da Garda Civil.
Como resultado destas actuacións, puidéronse localizar e incautar diversas doses de sustancias estupefacientes que
se corresponden con cocaína, unha cantidade importante de diñeiro en efectivo, e tamén útiles para dosificar as sustancias estupefacientes.
Polos ditos feitos os axentes procederon á detención da muller por “un suposto delito contra a seguridade colectiva por tráfico de drogas tóxicas, estupefacientes ou sustancias psicotrópicas”, realizándose as dilixencias oportunas para a súa posta a disposición xudicial.
O vehículo foi finalmente inmobilizado e trasladado co guindastre ao depósito municipal.
