A Deputación da Coruña aprobou na última sesión plenaria do 3 de outubro un modelo de convenio tipo de cooperación interadministrativa dirixido aos concellos da provincia con menos de 20.000 habitantes, co obxectivo de “facilitar a selección de persoal funcionario interino para postos de arquitecto/a e arquitecto/a técnico/a”. A deputada de Asistencia a Concellos, Cristina García Rey, destacou que “esta iniciativa reforza o noso compromiso de asistencia técnica aos municipios de menor capacidade de xestión, facilitando o acceso a profesionais cualificados de maneira eficiente e coordinada”.
Engadiu que “esta iniciativa responde á necesidade básica de todos os concellos de cubrir de forma áxil e eficaz os postos de persoal técnico temporalmente vacantes”. A formación dunha lista provincial, xestionada desde o Servizo de Asistencia Técnica a Municipios (SATM), permitirá optimizar estes procesos selectivos, explicou.
O convenio enmarcase nas competencias que teñen as deputacións para prestar asistencia e cooperación xurídica, económica e técnica aos municipios, especialmente a aqueles que teñen menor capacidade económica e de xestión, segundo establece a lexislación de réxime local.
Así mesmo, apóiase na disposición adicional primeira da Lei 20/2021, do 28 de decembro, de medidas urxentes para a redución da temporalidade no emprego público, que permite aos municipios, excepto os de gran poboación, encomendar a xestión material da selección do seu persoal funcionario interino e laboral temporal ás deputacións provinciais.
Funcionamento do sistema
-Proceso de solicitude: Os concellos interesados deberán presentar a súa solicitude asinada pola alcaldía a través do procedemento SUBTEL, acompañada dun escrito que especifique as características do posto e a duración mínima da vinculación.
-Xestión de candidatos: Unha vez recibida a solicitude, o SATM iniciará o proceso de chamamentos conforme ao Regulamento de selección de persoal funcionario interino e laboral temporal da Deputación. As persoas candidatas disporán de dous días hábiles para aceptar ou renunciar ao posto.
-Compromisos municipais: Os concellos comprométense a que o posto ofertado sexa a xornada completa ou, como mínimo, de tres días á semana, salvo acordo entre concellos limítrofes ou da mesma comarca que garantan conxuntamente a cobertura da xornada completa.
