Este domingo 28 de setembro celebrouse en terras de Rianxo e Dodro unha nova andaina do programa Goza do Ulla, organizado conxuntamente entre os ditos Concellos para achegar á veciñanza opcións de “desfrutar da fermosa paisaxe do treito final do río e do esteiro do Ulla”.
Participaron máis de cen persoas, que foron acompañadas polo tenente de alcalde e concelleiro de Deportes de Rianxo, Julio Alcalde.
O itinerario a percorrer non foi outro que o Roteiro de Sendeirismo As Brañas – Tres Cruces (desde A Lavandeira en Imo ata Rañó en Rianxo). A iniciativa contou ademais coa colaboración da Deputación da Coruña. Será o vindeiro 28 de setembro con saída ás 9.30 da mañá.
O itinerario percorreu camiños de Dodro e Rianxo, con saída na Lavandeira (Imo, Dodro) e chegada á Rañó (Leiro, Rianxo), pasando por varios lugares destacados da contorna do Ulla. Destacan o conxunto de hórreos da Lavandeira, As Brañas e As Tres Cruces, onde se atopa o Vía Crucis marítimo-fluvial do esteiro do río. O traxecto permitiu aos participantes desfrutar da paisaxe do esteiro, da ría de Arousa e da marxe oposta pertencente aos municipios de Catoira e Vilagarcía, incluíndo a illa de Cortegada.
