A oitava edición das Xornadas de Divulgación e Historia Pobrense “A Pobra do Caramiñal no tempo” arrancou este sábado no Teatro do Cine Elma cunha resposta multitudinaria. Máis de cen persoas asistiron aos relatorios iniciais desta cita cultural que busca poñer en valor a historia, o patrimonio e a identidade do municipio.
O alcalde, José Carlos Vidal, inaugurou o encontro destacando o orgullo que supón para o goberno local “comprobar que esta actividade suscita tanto interese entre a veciñanza e que hai tanta xente apaixonada pola historia e o patrimonio do municipio”. Na apertura participou tamén a concelleira de Cultura, Patricia Lojo.
O programa deste sábado incluíu catro conferencias. Miguel Conde abriu a xornada co relatorio “Tradición, cambio e fantasía nos nomes de lugar da Pobra”, no que compartiu o resultado do seu traballo de anos recollendo topónimos polas parroquias. A investigadora Nati Rey abordou os “Ritos de vida, ecos de morte: a fertilidade e a perda temperá nos cruceiros e na cultura popular”. Pola súa parte, Manuel Gago falou de “As árbores do concello na Pobra do Caramiñal e en Galicia: unha memoria perdida”, sobre a importancia destes elementos naturais como puntos de decisión colectiva. O encargado de pechar o día foi José Manuel Vázquez Lijó, da Universidade da Coruña, cun relatorio sobre as primeiras migracións pobrenses a América no século XIX.
As xornadas concluirán este domingo, 28 de setembro, cunha andaina para descubrir os cruceiros, lendas e rituais de San Isidro de Postmarcos. As 73 prazas dispoñibles para esta actividade xa están completas.
