A Asociación Boirense de Empresas (ABE) fixo un primeiro balance da campaña Volta ao cole: Cada compra suma, que se desenvolve entre o 10 de setembro e o 5 de outubro, cun sorteo final o día 6 de outubro. Segundo fai saber a patronal, “até a data xa se rexistraron 1.598 tíckets, situándose por riba dos rexistros do mesmo período xusto antes do lanzamento da campaña”. O novo reto é superar o récord histórico de 3.464 rexistros nun período de 26 días, acadado o pasado mes de agosto. Acadar esa cifra suporía unha participación excepcional e unha doazón solidaria significativa.
Como funciona a campaña
As persoas que realicen compras nos negocios asociados poden rexistrar os tíckets na web da ABE. Con cada rexistro participamos no sorteo dun ordenador portátil HP e, tamén, xeramos unha doazón de 0,10 € en bonos ABE, que a Cruz Vermella de Boiro repartirá entre familias necesitadas para mercar material escolar nos establecementos locais.
O presidente da ABE, Daniel García, destacou: “Queremos que cada compra conte por partida dobre: como apoio ao comercio local e como axuda directa a familias que necesitan un impulso extra neste comezo de curso”.
Chamada á participación
A ABE anima á cidadanía a seguir rexistrando tíckets e sumando puntos para a doazón, co obxectivo de bater todos os récords históricos da web e lograr o máximo impacto solidario nesta edición da campaña.
