O Ministerio de Agricultura, Pesca e Alimentación deu a coñecer as destinatarias dos XVI Premios de Excelencia á Innovación. Entre as galardoadas atópanse as mulleres cooperativistas do sector alimentario, que recibirán o premio honorífico do dito galardón (Premio de Excelencia á Innovación para Mulleres Rurais) polo seu labor colectivo e por constituír un referente para toda a sociedade e as novas xeracións.
Ademais, o ministerio outorgou os premios desta edición nas súas catro categorías, con tres galardóns por modalidade, dotados con 18.000, 12.000 e 7.500 euros respectivamente.
Esta iniciativa reforza o compromiso do Ministerio coa igualdade de xénero, o acceso das mozas á actividade agraria e a diversificación económica como ferramenta para frear o despoboamento rural.
Na categoría de Premio de Excelencia á Innovación na Actividade Pesqueira ou Acuícola resultou galardoada co segundo premio María del Carmen Sánchez Sánchez (Galuriña, Esteiro, A Coruña) polos seus produtos de panadería enriquecidos con macerados de algas propias. O seu negocio (Galuriña) consiste nunha empresa especializada en masa con algas: empanadas con peixes, mariscos e a gama vegana e pizzas de diferentes sabores. Traballa con algas tipo himanthalia, wkame, ulva e nori, todas elas certificadas como recolectores polo CRAEGA (organismo de certificación de produtos ecolóxicos en Galicia) .
