Os deputados do Grupo Popular no Parlamento de Galicia Ángel Rodríguez e Magdalena Pérez salientaron hoxe, durante unha visita ao monte veciñal en man común Cruz de Avelá, en Dodro, a relevancia dos traballos preventivos na loita contra os incendios forestais.
Acompañados polo membro da Xunta reitora da comunidade de montes, Pablo Rial, e por varios comuneiros, puxeron en valor accións como a creación de áreas cortalumes ou a introdución de gando para o control da biomasa vexetal. Segundo lembraron, o Goberno galego destinou este ano arredor de 50 millóns de euros a prevención, o que supón un incremento do 35 % con respecto a hai dez anos.
Tras a vaga de lumes rexistrada en agosto, os deputados populares animaron ás persoas afectadas a solicitar canto antes as axudas dispoñibles para recuperar vivendas, explotacións agrarias e gandeiras ou negocios. “O Goberno galego estivo, está e estará ao carón dos afectados, tanto no momento no que ardía o monte como agora, poñendo á súa disposición un completo paquete de axudas”, subliñaron.
Oficinas de información e destino das axudas
Desde o 1 de setembro xa se poden tramitar as solicitudes a través das 17 oficinas de información repartidas por toda Galicia, así como no teléfono 012.
As achegas poderán destinarse á reconstrución de vivendas e reposición de mobiliario, reparación ou substitución de maquinaria e equipamento agrario, compra de alimentación complementaria para gando ou colmeas, indemnizacións por perdas de animais e reparación de infraestruturas danadas, como pistas forestais, captacións de auga ou peches.
Rodríguez e Pérez fixeron un chamamento a “valorar os danos e facer as correspondentes solicitudes, tendo presente o compromiso da Xunta de axilizar ao máximo a tramitación para que os afectados poidan recuperar canto antes a súa normalidade”.
