O concelleiro de Deportes, Marcos Fajardo, participou na presentación dos actos do 35 anivesario do CB Santa Baia, que comezan este sábado 6 de setembro cun encontro entre o Celtafemxa Zorka e o Baxi Ferrol. Na presentación estiveron tamén Guillermo Outeiral, representante do CB Santa Baia; Carlos Álvarez, presidente do Celta feminino e Uxía Rodríguez, xogadora.
O encontro terá lugar o vindeiro sábado 6 de setembro ás 19.00 horas no Pavillón da Cachada e dará inicio aos actos do 35 aniversario do CB Santa Baia. “Un evento que une a dous grandes clubs da nosa comunidade e que vai facer historia”, afirmou Guillermo Outeiral.
Por parte do Celta, Uxía Rodríguez recoñeceu que “este partido vainos axudar moito na nova tempada que collemos con moitas ganas para poder volver á Liga feminina 1”. O seu presidente, Carlos Álvarez, agradeceu o convite a poder participar neste encontro que “fai que o baloncesto feminino chegue a máis xente” .
O concelleiro de Deportes, Marcos Fajardo, animou á veciñanza de Boiro a achegarse o sábado ao Pavillón da Cachada para presenciar este encontro e celebrar co CB Santa Baia o seu 35 aniversario: “Un club moi modesto pero que está colleitando numerosos éxitos gracias ao esforzo e dedicación da súa directiva e os xogadores e xogadoras das distintas categorías”.
