A Asociación de Empresarios de Ribeira (AER) emitiu un comunicado no que fai balance dos fitos acadados na nova edición, a cuarta, da feira gastronómica gastronómica Gastromar, celebrada entre os días 22, 23 e 24 de agosto na praza de España de Santa Uxía co obxectivo de reivindicar a excelente calidade dos produtos pesqueiros e marisqueiros locais. En primeiro lugar a patronal expresou o seu agradecemento ao público que asistiu en masa á degustación dos produtos da ría, tanto foráneos como residentes. Coa súa presenza, engade a AER, “vemos recompensado o noso esforzo por dotar a Ribeira dunha festa gastronómica de gran calidade”.
A asociación tamén expresou o seu máis sincero agradecemento a todas as institucións e entidades que, co seu apoio e colaboración, fan posíbel a celebración deste evento: a Xunta de Galicia, a Deputación da Coruña e o Concello de Ribeira, e tamén as confrarías de Ribeira, Carreira e Aguiño, a Sociedade Cooperativa Galega do Mar Santa Uxía, así como as empresas Chicolino, Pesca al Día, Talaso Barbanza e Jaldamar de Antonio Torres, “que de maneira altruísta proporcionounos o peixe espada servido na degustación”.
No comunicado tamén expresan o seu recoñecemento á Asociación da Praza de Abastos de Ribeira, ao Restaurante Tío Pepe, á Vinoteca de Tucho, ás Adegas La Parra, a Ferrovial, a Viaqua e á Asociación Cultural Lajareu por Barlovento, “que nos cedeu a dorna Ardentia para a decoración”.
O agradecemento esténdese tamén aos medios de comunicación, “cuxo incondicional apoio e ampla cobertura antes, durante e despois do evento resultaron fundamentais”, e tamén á empresa local A Poutada, pola súa participación coa exposición dunha embarcación.
E engaden: “Sabemos que a lista é extensa, pero non queremos deixar de insistir en que este evento está aberto a todas aquelas empresas e entidades que desexen sumarse en futuras edicións. Desde que collemos as rendas da Asociación de Empresarios o noso compromiso é con Ribeira, o seu comercio, as súas empresas e as súas xentes e é por iso que non cesaremos de realizar todos aqueles eventos aos que poidamos chegar da man das institucións e empresas que tanto necesitamos, ás que xa participan reiteramos as grazas, aos que non, esperamos velas axiña”.
Respecto das críticas vertidas cara a organización da nova edición de Gastromar, sinalan que “cremos que é mellor non contestalas, xa que é mellor respondelas cos feitos”. Porén, a patronal si que sae ao paso dos comentarios sobre o cambio de datas, sinalando que “isto non foi un capricho noso, xa que na celebración da III edición ano 2024 coincidimos coa Festa do Polbo de Palmeira, e este feito causou malestar, polo que en reunión co Concello trasladáronnos que Palmeira tiña a súa celebración a última semana de agosto, motivo polo cal acordamos ambas as partes celebrar Gastromar a penúltima fin de semana do mes e a Feira do Polbo o último como eles pediron”. A sorpresa, critican dende a AER, cando “vimos que o Concello mudou a data da Feira do Polbo”. E engaden: “Non foi pola nosa culpa que a pasada fin de semana coincidisen Gastromar, a Festa do Polbo de Palmeira e Festas en Castiñeiras”.
