20190711 A arte e o humor están na rúa, a pé das terrazas e das portas das casas, e Rianxo vai rebordar esta finde de retranca e creatividade. Estamos a falar do RianClown, o festival cómico de rúa, que se celebra entre o 12 e o 15 de xullo en diferentes recantos da vila rianxeira. O certame vén da man da Asociación Virxe do Carme coa colaboración do Concello e a Deputación da Coruña.
O programa é o seguinte: o venres 12 actúa Asacocirco, co espectáculo Circo de Lume, na praza de Castelao a partir das 21.30 horas. Ao día seguinte, será a quenda de N+1 con Circanelo, a partir das 12 horas na Praciña. O domingo actuará Antón Coucheiro, Cou, co espectáculo Sonámbulo, na praza da Manuela a partir das 12.00 horas. O luns rematan as actividades da man de Peter Punk e Brais das Hortas, que ofrecen un concerto punkinfantil na praza de Castelao a partir das 21.30 horas.
Para máis información sobre as actividades e os horarios cómpre visitar o espazo no Facebook da Asociación Virxe do Carme.
