A parroquia ribeirense de Aguiño celebrou con gran éxito a novena edición da súa xa tradicional Festa da Navalla, unha cita gastronómica e cultural que atraeu a numerosos veciños e visitantes.
O evento contou cunha ampla oferta culinaria, con 450 quilos de navalla, 180 quilos de sardiña, empanada, viños e refrescos para todos os asistentes. A música tamén tivo un papel protagonista grazas ás actuacións do grupo Chiña e da formación Habelas Hailas, que animaron a xornada e fixeron bailar ao público.
O concelleiro de Mar, Fernando Abraldes, destacou “o traballo e esforzo dos navalleiros, que fan posible que esta festa sexa unha realidade ano tras ano” e puxo en valor “a altísima calidade dos produtos do noso mar, recoñecidos tanto en Galicia como fóra das nosas fronteiras”.
Pola súa banda, o alcalde, Luís Pérez, subliñou que “o Concello apoia decididamente esta cita gastronómica, que xa é un referente no calendario festivo da comarca e un motor para a hostalaría e o turismo local”. Engadiu que “o sector do mar é un dos piares fundamentais da economía ribeirense, xerando emprego, riqueza e identidade para a nosa vila”.
A IX Festa da Navalla de Aguiño consolidouse como unha xornada que mestura sabor, tradición e música, poñendo en valor os produtos do mar e reforzando o papel da gastronomía como atractivo turístico da zona.
