Este sábado 9 de agosto celébrase en Rañó (Leiro, Rianxo) a cuarta edición da Festa Gastronómica de Leiro. Será no merendeiro da Lomba a partir das 12.30 horas. Organiza a Confraría de Pescadores Virxe do Carme co apoio do Concello de Rianxo, entre outras entidades.
A festa arrincará ao mediodía, ás 12.30 horas, cun concerto da Banda Xuvenil da Escola de Música de Rianxo, e proseguirá ás 14.00 horas cun xantar amenizado por Río do Anxo. Haberá, na vertente gastronómica, empanada de xouba, choco con arroz na súa tinta, anguía fritida e polbo con fabas e centola.
A axenda da tarde continuará ás 18.00 horas coa actuación de The Cuncas, seguida da música de DJ Berto.
Para aquelas persoas interesadas en reservar mesa para a comida, poden facelo chamando ao 658 116 944.
