O Estado de Alarma e a crise sanitaria do COVID-19 segue a motivar a cancelación de eventos que non só estaban programados para marzo e abril, senón tamén para máis adiante. Por exemplo a edición número trece da Concentración Moteira Jas A Tope de Rianxo, cuxa organización (o Moto Club Jas A Tope en colaboración co Concello), ao “non poder garantir a seguridade do evento pola posibilidade de contaxio”, decidiu suspender a quedada, inicialmente prevista para comezos de xuño, para máis adiante, ou sexa, para cando a situación se normalice.
Malia todo e precisamente por ter que tomar a decisión de cancelar o evento “con gran tristura”, a entidade impulsora aproveitou para agradecer a colaboración de todas as entidades e empresas que traballan cada ano para facer realidade a cita moteira, ao tempo que se lles lanza unha mensaxe de ánimo nestes tempos de pandemia e crise sanitaria aos participantes e aos seareiros de cita.
