O encontro terá lugar este martes 22 ás 19.30 horas no Lustres Rivas, da man da asociación Illa de Rúa e co apoio das concellarías de Turismo e Mar
O farero Julio Vilches, quen durante 40 anos residiu na illa de Sálvora e estivo ao cargo do seu faro, presentará este martes 22 de xullo en Ribeira o seu libro Sálvora, diario de un farero, unha publicación na que recolle as súas vivencias e reflexións tras décadas de soidade, natureza e mar.
O acto celebrarase ás 19.30 horas no auditorio Lustres Rivas, e está promovido pola asociación Illa de Rúa, coa colaboración das concellarías de Turismo e Mar do Concello de Ribeira. Acompañando ao autor estarán o presidente da asociación, Dani González, e o concelleiro de Mar, Fernando Abraldes.
Durante a presentación, os asistentes poderán escoitar en primeira persoa o relato de Vilches sobre a vida no faro, o día a día nun enclave illado e cheo de historia, e os episodios que marcaron a súa longa estadía na illa.
O libro está dispoñible exclusivamente a través de internet, polo que esta será unha ocasión especial para coñecer máis de preto a figura do farero e o contido da súa obra.
