Entre os grandes acontecementos musicais do verán no Barbanza figura por dereito propio o certame Festival Noites de Jazz en Rianxo, edición 2025, organizado polo Concello coa colaboración da Deputación da Coruña. O programa, moi diverso e moi envorcado na formación, arrincou xa en febreiro coa primeira actividade do festival: unha jam session no paseo da Ribeira coa colaboración da EMR e a Cafetería Castelao. O 1 de xullo tivo lugar outra sesión en A Lareira co combo da EMR dirixido por Bernal Muíños.
Ademais, leváronse a cabo tres concertos didácticos en colexios de Rianxo, impartidos por Alfredo Susavila (piano) e Bernal Muíños (saxo), introducindo ao alumnado nos estilos do jazz mediante estándares clásicos e reinterpretacións participativas como A Rianxeira.
Ademais, o festival vén en xullo cun Curso de Big Band, impartido durante todo xullo na Escola de Música de Rianxo incluíndo materias como historia do jazz, teoría aplicada, técnicas instrumentais, improvisación e repertorio. Culminará co concerto de clausura o 29 de xullo, que abrirá o festival.
Lembrar tamén, no capítulo formativo, que do 26 ao 30 de xullo Francisco Muñiz impartirá un curso de baile de swing no Cuartel Vello. Rematará cun baile social de clausura o 2 de agosto na praza Rafael Dieste.
Concertos – praza de Rafael Dieste – 22.00 h
29 de xullo: Big Band da EMR.
30 de xullo: Pablo Sanmamed Trio + Benxamín Otero, galardoados co Premio Martín Códax 2024.
31 de xullo: Swing Titáns, homenaxe á época dourada do swing.
1 de agosto: Sumrrá, trío galego máis internacional, celebra o seu 25 aniversario cun repertorio dos seus mellores temas.
