O Concello de Ribeira presentou este 9 de xullo os detalles da nova actuación de El Brujo en Santa Uxía. Na cita cos medios participaron a concelleira de Cultura, Antía Alberte, xunto cos técnicos de Cultura, Sara e Unai. Trátase, sinalaron, dunha nova proposta escénica para o outono no Auditorio de Ribeira froito das colaboracións con promotoras que “nos fan achegar á nosa cidade os mellores espectáculos da escena galega e tamén nacional” puntualizou a concelleira.
Alberte lembrou, que no ano pasado uns meses despois da inauguración do novo Auditorio “acollemos nestas instalacións un dos espectáculos de Rafael Álvarez, El Brujo, conseguindo un aforo completo e unha gran acollida que fixo que o mesmo artista manifestara o seu interese e intención por volver á nosa cidade”.
Un ano despois daquela actuación, engadiu, “volveremos gozar coa magnífica interpretación deste artista”.
Rafael Álvarez, El Brujo, estará no auditorio o 18 de outubro de 2025 ás 20:00 horas para presentar o seu espectáculo titulado El viaje del Monstruo Fiero.
Nesta proposta, o actor cordobés refunde os seus últimos catro espectáculos nunha divertida comedia onde rende homenaxe a intérpretes do Século de Ouro. Sobre o escenario, acompañado pola música en directo de Javier Alejano, o artista presentará diversos textos de Lope de Vega, Quevedo, Cervantes, Shakespeare ou Santa Teresa.
As entradas para este espectáculo poranse á venda dende o vindeiro luns 14 de xullo ás nove da mañá, podendo mercarse online a través de ataquilla.com ou de xeito presencial na oficina de atención cidad de luns a venres para facilitar a compra a aquelas persoas que non manexan as novas tecnoloxías.
O prezo da entrada quedou fixado en 20 euros (máis gastos de xestión de Ataquilla) para as butacas xerais, e en 18 euros (máis gastos de xestión) para as butacas que denominamos de baixa visibilidade que son a primeira fila e os balcóns superiores.
Antía Alberte rematou sinalando que “nas vindeiras datas continuaremos anunciando máis propostas para o outono no Auditorio xa para ir deseñando unha axenda completa e con programación variada”.
