A banda galega Mediarea estará os días vindeiros na comarca do Barbanza, ao abeiro da xira Fillos da Virasón, presentando os seus novos temas e facendo repaso das súas contribucións previas. Na nosa comarca achegarán dous concertos para residentes e visitantes: en Rianxo o 16 de xullo (na praza de Castelao ás 22.00 horas) e na Pobra do Caramiñal o 19 de xullo.
O primeiro dos concertos, encadrado no ciclo Noites de Folc, é unha proposta enmarcada na programación da Rede Cultural da Deputación da Coruña, coa colaboración da Asociación Virxe do Carme de Rianxo.
Mediarea é unha formación do Morrazo, nacida en 2019 e formada por Gael Pérez, Luís Malvido, Zé Pumar e Rodri Martínez. Unidos por un amor común pola música patrimonial galega e polo sentido da responsabilidade de contribuír á súa boa saúde e creatividade, formaron un grupo que vai gañando co tempo, coma o bo viño.
