Tres cazadores sentaranse os días 10 e 11 deste mes no banco dos acusados da sección compostelá da Audiencia Provincial da Coruña para responder pola agresión a outro home ocorrida no ano 2017. A Fiscalía solicita para cada un deles penas de cinco anos de prisión, así como unha indemnización conxunta de 28.000 euros para a vítima polos danos físicos e morais sufridos.
Os feitos remóntanse ao 22 de outubro de 2017, cando os acusados, segundo o escrito fiscal, golpearon de maneira reiterada un veciño de Cespón, na parroquia boirense, despois de que este lles recriminase que non podían cazar na zona ao haber vivendas próximas, a uns 70 metros.
O Ministerio Fiscal relata que, tras unha discusión inicial, os cazadores actuaron con evidente desprezo pola integridade física da vítima, atacándoo “de forma violenta e con intención de causar prexuízos”.
Como consecuencia da agresión, o home sufriu lesións graves, incluíndo unha fractura no omóplato esquerdo, que precisou tratamento cirúrxico e deixoulle secuelas permanentes, como limitación de mobilidade e dores crónicas.
A Fiscalía subliña a especial agresividade e intensidade da acción, polo que cualifica os feitos como delito de lesións con deformidade, pedindo a súa entrada en prisión e o pago dunha compensación económica.
