O Concello de Boiro vén de contratar catorce socorristas que prestarán servizo nos areais do municipio durante a época estival. O alcalde, José Ramón Romero, acompañounos na tarde deste 27 de xuño coincidindo co inicio da súa actividade.
Os socorristas prestarán servizo nos areais de Barraña-Saltiño, Carragueiros e Mañóns de luns a domingo en horario de 14.30 a 21.00 horas dende este venres 27 de xuño ata o 31 de agosto.
“Son os areais máis concorridos do municipio e nos que se precisa maior vixilancia durante a época estival para previr incidentes e atender emerxencias que se poidan producir”, afirmou o alcalde.
Para levar a cabo esta contratación o Concello de Boiro recibe unha subvención da Consellería de Presidencia, Xustiza e Deportes por importe de 17.101 euros para dotar de persoal de salvamento as praias durante a época estival e desenvolver tarefas de vixilancia e primeiros auxilios aos bañistas dos areais.
