Con 114 anos de vida, o histórico edificio da Terraza -bandeira do modernismo coruñés- que fora casino, sala de festas e, rematada a Guerra Civil española, sede da Organización Juvenil Española (OJE), de Radio Juventud de Galicia e, desde 1985, do Centro Territorial de Radio Nacional de España en Galicia e da unidade informativa de TVE na Coruña, será en 2028 e durante polo menos ata 2043 a sede da Axencia Estatal de Supervisión da Intelixencia Artificial (AESIA). Para que sexa así, RNE e TVE trasladaranse en xeneiro de 2028 ao edificio propiedade de Correos ubicado na rúa Manuel Casas, no lateral do Teatro Colón.
Así se estipula no contrato asinado por RTVE e Correos o pasado 20 de xuño, que garante durante os seguintes 15 anos a estadía no edificio de Correos dos estudos e redacións de RTVE na Coruña.
AESIA ocupará unha superficie total de 710 metros cadrados do primeiro andar do edificio da Terraza, así como parte das terrazas, que serán equipadas con material técnico.
O comezo das obras está previsto para outubro de 2026, cunha duración dun ano.
Nos anos 50 do século pasado Radio Juventud de Galicia, dirixida por José Couceiro Tovar, estreou os seus estudos -ata entón instalados da rúa Juana de Vega- no segundo andar do edificio A Terraza. Foron tempos nos que se formaron na, daquela, Estación Escola EFJ11 os mellores locutores, técnicos de son, redactores deportivos, técnicos de alta, etc., que en pouco tempo deron o salto á TVE e outras emisoras de radio de Madrid, Vigo, como Javier Basilio Pérez, José María Comesaña, Adolfo Rivas, Bernardo Díaz, Paulino Santos, quedando aquí, entre outros, Ananda Español, Carmen Deus, Pachi Cristóbal, Rosendo Rocha, Fernando Díaz Corujo, María Teresa Vivero, Carlos Cortón, Enriqueta Guzmán Sanguino, Pablo Campos Manrubia, Gerardo Fraga Blanco, Juan Gullín, Antonio Amado, Jorge García Barros, Santiago Vilariño Monteagudo, Mario González Velo, José Antonio Martínez Arias, etc., etc.
Son profesionais da radio e a televisión que deixaron moi alto o nome de Galicia na historia da radio e a televisión da España dos anos 60 ata os nosos días. Moitos deles alternando as funcións coa prensa escrita.
