A Ría da Estrela e a Asociación de Concellos do Camiño da Ría Muros veñen de iniciar esta semana una ronda de presentacións pola Península Ibérica para dar a coñecer un novo concepto de ruta xacobea: o Camiño Marítimo da Ría de Muros Noia. Unha iniciativa que arrincou este martes 24 de xuño en Madrid e que tivo continuidade este mércores 25 en Valladolid, reunindo a unha trintena de prescriptores. Lisboa e Zaragoza serán as próximas paradas, xa no mes de xullo.
A asociación lembrou que o Camiño Marítimo da Ría de Muros Noia ofrece peregrinar a Santiago a través dunha ría e uns portos cunha longa tradición xacobea, especialmente o de Noia que no seu momento foi o Portus Apostoli de Compostela: “Trátase dunha travesía que rememora o percorrido que seguiron milleiros de peregrinos dende os tempos da Segunda Cruzada e, especialmente, o navegante veneciano Pietro Querini en outubro de 1431”, sinalou a asociación, engadindo que “ao tratarse dun trazado recoñecido oficialmente polo Cabildo Catedralicio, abonda con completar 90 millas náuticas en veleiro, selar a credencial do peregrino nos portos indicados e facer a pé cando menos os 12 últimos quilómetros entre Bertamiráns e Santiago para obter a Compostela”.
“A nosa proposta está a ser moi ben recibida. Uns poñen o énfase na súa orixinalidade e outros poñen en valor o feito de recuperar unha forma de peregrinación a vela típica doutros séculos”, apuntou José Antonio Marcote, responsábel de comunicación da Ría da Estrela, que xunto a Sebastián Valverde, xerente da Asociación de Concellos do Camiño da Ría de Muros Noia están protagonizando estas presentacións.
Peregrinacións marítimas
“Estamos a presentar unha maneira diferente de facer o Camiño de Santiago pero que hai séculos era a principal: navegando”, explica Sebastián Valverde, engadindo que “estamos perante un novo produto turístico que desborda o ámbito da nosa ría, onde o turista ou peregrino pode reservar barcos ou camarotes para desfrutar dunha experiencia absolutamente única: peregrinar a Compostela a bordo dun veleiro e por unha das zonas turísticas máis espectaculares a nivel mundial”.
Como apunta Sebastián Valverde, “a historia moderna das peregrinacións a Santiago comeza en 1990, pero ata 2025 non se propuxera en Galicia como desenvolver e xestionar as peregrinacións marítimas como produto turístico. É, polo tanto, unha primicia dentro do noso país e nela xoga un papel esencial a peregrinación de Pietro Querini”. Unha proposta que está tendo unha gran aceptación non so de público, senón tamén dos propios operadores implicados na iniciativa, que pasaron de 1 a 4 en tan só seis meses, salientou.
O primeiro operador é Sailway, unha navieira de chárter náutico que ofrece unha experiencia de catro días a bordo dun veleiro, 94 millas náuticas con saída do Monte Real Club de Yates de Baiona e chegada ao Real Club Náutico de Portosín. Ademais, ofrécelle ao peregrino diferentes opcións: dende alugar un veleiro (con ou sen patrón) ata facerse cun camarote, cunha ampla variedade de prezos. Outra navieira Julio Verne Náutica é a última incorporación do catálogo ata o momento. Oferta embarcacións de luxo e un percorrido de cinco días, catro delas polas rías de Vigo, Pontevedra e Arousa, unidas a un último día de camiño a pe ata chegar a Compostela.
O Monte Real Club de Iates de Baiona promove a V Ruta Rías Baixas-Camiño de Santiago Ría Muros Noia, unha peregrinación en grupo que se celebra do 30 de xuño ao 5 de xullo de 2025 e que será presentada mañá xoves en Baiona. Por último a Travesía Náutica Xacobea de ASNAUGA ofrece un bono descontos en amarres nos portos deportivos galegos, percorrendo os clubs náuticos de Galicia distinguidos coa Q de calidade turística e que apostan pola atención ao navegante, para así peregrinar a Santiago ben desde Ribadeo (Ruta Norte) ben desde Vigo (Ruta Sur).
“Paisaxismo, deporte, aventura, historia e espiritualidade, porque non deixa de ser unha ruta xacobea. Son valores que determinan o éxito do Camiño Marítimo da Ría de Muros Noia”, concluíu Antonio Marcote, quen lembrou que toda a información está dispoñíbel nas páxinas web www.caminomaritimo.gal, www.caminomaritimo.es e www.caminomaritimo.com.
