O pasado venres 20 de xuño, tivo lugar en Santiago de Compostela o acto de clausura do Programa Universitario do IV Ciclo da USC, Democratización do Coñecemento, dirixido pola sonense Esther Olveira.
O alumnado de Porto do Son, que recolleu os seus diplomas acreditativos, estivo acompañado pola concelleira de Cultura, Alicia Martínez, e por José Manuel Vázquez, técnico do Museo Marea e colaborador docente no devandito programa.
Lembrar que as actividades da USC en Porto do Son (IV Ciclo) incluíron este ano importantes iniciativas, como unha visita á Biblioteca de San Francisco e o Arquivo-Biblioteca da Catedral de Santiago.
Na Biblioteca de San Francisco, guiados polo frade Miguel de la Maya tiveron a fortuna de ver incunábeis e outras xoias bibliográficas coma a Biblia Políglota Complutense ou unha versión francesa da Metamorfose de Ovidio con gravados censurados
Mentres tanto, o outro grupo visitou o Arquivo-Biblioteca da Catedral de Santiago, guiado polo técnico Arturo Iglesias. Na biblioteca puideron ver o facsímile do Calixtino, incunábeis, cantorais en gran formato e algunha obra prohibida pola Inquisición.
A axenda tamén incluíu obradoiros de poda de árbores froiteiras, forestais e ornamentais e unha aproximacións á Historia da Música Galega e aos instrumentos de percusión, entre outras actividades.
