A Consellería do Mar, a través de Portos de Galicia, anunciou un investimento de 265.000 para a renovación das luminarias do porto de Ribeira por tecnoloxía LED de alta prestación e control telemático. As obras están en execución esta semana e, en palabras do ente autonómico, “permitirán modernizar o alumeado exterior do porto, reducindo o consumo enerxético”.
Portos engadiu que esta actuación enmárcase nun plan global para unha trintena de dársenas autonómicas no que a entidade inviste este ano 3 millóns de euros para dotar de sistemas de alumeado exterior sustentábel ao sistema portuario autonómico.
En concreto, no porto de Ribeira, estase a actuar sobre 169 luminarias e proxectores para a súa renovación, incluíndo a retirada das instalacións existentes, substitución polos novos equipos LED, así como a dotación de sistemas de telexestión.
O obxectivo principal destes traballos de modernización é “reducir a contaminación ambiental e luminosa nos espazos portuarios, co apoio dun sistema de control remoto das luminarias”, sinalou Portos, engadindo que con estas intervencións “aportarase maior comodidade visual aos seus traballadores e usuarios ademais de procurar ese aforro enerxético estimado do 60 %”.
A tecnoloxía LED que se vai habilitar está “especialmente deseñada para traballar en espazos portuarios pola súa durabilidade en ambientes mariños e condicións climáticas adversas”. Ademais, incrementarase a protección contra sobretensións e implantarase unha capa tecnolóxica para o telecontrol de iluminación, engadiu Portos, explicando que “esta actuación únese á recentemente rematada de renovación dos pavimentos nas vías do porto de Ribeira”. En concreto, o ente público executou un novo pavimento en varias zonas do peirao, o aparcadoiro da lonxa, o paseo das Carolinas e a avenida do Malecón. O investimento total desta actuación foi de 140.000 euros.
Ademais, Portos de Galicia vén de emitir autorización para a celebración de dúas celebracións de festas no porto ribeirense de Palmeira. Así, o ente público outorgou xa os permisos para as festas de San Xoán desta parroquia así como para os festexos estivais que se celebran no mes de agosto.
