O Concello de Boiro colabora coa veciñanza de Bealo na celebración da IV Muiñada de Bealo, que se celebra este domingo 15 de xuño a partir das 17.00 horas. A concelleira de Cultura, María Outeiral, presentou a actividade xunto con Juan Carlos García e Miguel Rial, membros da asociación de veciños.
“Esta actividade naceu co obxectivo de poñer en valor o muíño da ponte de Bealo e conservalo para as xeracións vindeiras con actividades que xiran en torno á tradición popular”, afirmou Miguel Rial. O programa de actividades comezará ás 17.00 horas cunha mesa redonda para a recollida e documentación de coplas e bailes, exposición de aparellos de labranza e fotos antigas e musica e baile popular con Pedra da Aroña e Nunca é Tarde.
“Faremos tamén unha visita ao muíño e posta en funcionamento para amosar como se facía a fariña”, sinalou Juan Carlos García. As actividades continuarán cunha merenda e actuación de Maruxa e Coralia.
A concelleira de Cultura, María Outeiral, agradeceu “o esforzo que os veciños de Bealo fan por preservar e poñer en valor a nosa tradición e dala a coñecer entre a xente mais nova cunha actividade como esta muiñada que vai collendo máis sona cada ano”.
