O Concello de Boiro fixo balance da nova edición do proxecto EnClave, levada a cabo durante o curso 2024/2025 con formato de programa integral de educación, igualdade e saúde. O alcalde, José Ramón Romero, e a concelleira de Ensino, Carmen Silva, presentaron na mañá deste 11 de xuño os resultados das distintas accións. Lembraron que EnClave comezou a desenvolverse no ano 2021, que conta cun financiamento de 51.902 euros e que forma parte da aposta do Concello de Boiro por “unha educación de calidade que constrúa unha sociedade xusta e equitativa, cunha poboación saudábel e máis capaz de participar e contribuír á igualdade social”.
Engadiron que o proxecto conta con áreas de actuación diferenciadas con distintos programas a desenvolver nos centros de ensino. A primeira das áreas e a de Igualdade e Diversidade na que se desenvolveu o programa de Intervención e prevención do acoso escolar, unha proposta que combinou a intervención directa co alumnado e a formación e implicación do profesorado e das familias. Realizáronse un total de 90 sesións grupais e 39 individuais nas que se abordaron temáticas como o concepto de bo querer, autoxestión emocional, empatía e responsabilidade afectiva…
Dentro desta área tamén se desenvolveu o programa de Detección Temperá da Dislexia e TDH/TEA coa Facultade de Psicoloxía da USC, un programa no que se traballou co alumnado de 1º a 3º de primaria para facer un diagnóstico previo con vistas a detectar posíbeis casos e ver a necesidade de establecer protocolos de intervención para paliar as repercusións do alumnado no seu rendemento académico, emocional ou social.
O segundo dos grandes bloques é o de Saúde e Benestar no que se desenvolveu o programa de Hixiene Bucodental mediante a Facultade de Odontoloxía da USC, no que se fixo un recoñecemento previo do estado xeral da saúde bucodental dos escolares e unha avaliación do coñecemento dos nenos en canto a hixiene bucodental, dieta carioxénica e consumo de azucres. Dentro desta área desenvolveuse tamén o programa de Avaliación Optométrica e Visual coa Facultade de Óptica e Optometría da USC que realizou un cribado visual no alumnado de 2º e 3º de primaria para detectar anomalías que de xeito xeral pasan desapercibidas. O último dos programas foi o de Intervención en saúde mental que permite unha intervención temperá que evita a cronificación de trastornos emocionais e a diminución dos casos de ansiedade leve-moderada e en condutas disruptivas.
A terceira gran área é a de educación, na que se desenvolveu o programa de Educación Emocional para traballar na súa expresión oral e corporal mediante o xogo dramático e o teatro emocional. “Trátase dun proxecto dunha dimensión moi ampla e cunha valoración moi moi positiva en todos os programas, que aborda as principais problemáticas detectadas no ámbito educativo polas familias e o persoal docente”, afirmou a concelleira Carmen Silva.
O proxecto EnClave é un programa innovador que busca atallar as principais problemáticas que se detectan nos centros de ensino e ten como finalidade a redución significativa dos casos de acoso escolar, unha maior conciencia e sensibilización sobre a importancia da saúde mental e conseguir un alumnado máis apoderado emocionalmente, capaz de xestionar as súas emocións e resolver conflitos de maneira pacífica. “A pesar de non ter as competencias en educación imos seguir apostando por levar a diante este programa, adaptándoo ás novas necesidades que vaian xurdindo, porque os resultados amosan que favorece a unha mellora da convivencia nos centros e da saúde dos nosos rapaces e rapazas”, afirmou o alcalde, José Ramón Romero.
