A Asociación Cultural Mariñeira Os Patexeiros organizou este sábado 7 de xuño a presentación oficial da nova embarcación de media construción: O Patexo. A cita foi ao mediodía do sábado nos Estaleiros Catoira de Rianxo. O Patexo é a máis recente incorporación á frota da asociación e foi realidade grazas á colaboración de diversas administracións.
“O Patexo”, explicaron, “supón a recuperación dunha tipoloxía que foi desaparecendo do Golfo Ártabro, como é a de media construción”. Con esta iniciativa, engadiron dende a asociación, “volverá verse nas nosas augas esta tipoloxía de embarcación grazas ao que supón non só un labor de recuperación dunha fasquía tradicional, senón tamén, de todo un saber mariñeiro ligado á carpintería de ribeira”.
Na botadura participaron os integrantes da asociación e tamén o alcalde de Rianxo, Julián Bustelo, quen sinalou a importancia de recuperar este tipo de embarcacións para “manter viva a nosa tradición e os saberes propios da cultura mariñeira”. Neste senso, destacou o traballo que vén desenvolvendo Ramón Collazo, responsábel de Asteleiros Catoira e Presidente de AGALCAR, para a recuperación deste patrimonio e para a súa transmisión as xeracións futuras.
