A Garda Civil e a Policía Local de Noia detiveron este venres a un home que presuntamente roubou un autobús na estación de autobuses da vila e protagonizou unha fuxida con múltiples danos materiais antes de ser interceptado.
Segundo fontes policiais, o detido subtraeu un vehículo da empresa Autos Comparado e emprendeu a marcha por distintas rúas da localidade. Durante a súa fuxida, bateu contra varios coches aparcados, causando importantes danos a dous vehículos na zona de San Bernardo.
A súa carreira rematou de forma abrupta ao intentar atravesar, sen éxito, a ponte medieval de Traba, unha estrutura histórica do século XV que conecta coa zona do Couto. Polas súas dimensións, era imposible que o autobús puidese pasar pola estreita vía de pedra, o que provocou que o vehículo quedase encallado e sufrise un forte impacto contra os elementos de entrada da ponte, catalogada como ben patrimonial protexido.
Tras o accidente, o condutor abandonou o autobús e intentou fuxir a pé. Non obstante, os axentes, que xa seguían a súa pista desde o inicio da fuxida, lograron darlle alcance, inmobilizalo e proceder á súa detención.
A pesar da perigosidade dos feitos, non se rexistraron feridos, aínda que os danos materiais foron cuantiosos, especialmente na ponte e nos vehículos afectados.
As autoridades están a investigar os feitos e valoran os danos ocasionados, tanto ao patrimonio público como aos bens privados. O detido podería enfrontarse a varios cargos, entre eles, roubo de vehículo, danos materiais e atentado contra o patrimonio.
