Por se fora pouco o prexuízo derivado da choiva que recolle a ría de Arousa nos últimos tempos e o dano que ocasionarían os vertidos da macrocelulosa que Altri pretende instalar en Palas de Rei, dous dos mariscos bivalvos máis apreciados nesta ría dan mostra evidente do perigo que corren: a ameixa babosa e o berberecho son moito máis vulnerables aos episodios de calor extrema. Pola contra, a ameixa fina (ou de Carril) e a ameixa xapónica son máis resilientes a estes eventos que elevan a temperatura da auga e dos sedimentos nos que se enterran.
Son estas conclusións do traballo que forma parte da tese doutoral do oceanógrafo Adrián Castro-Olivares, membro do Centro de Investigacións Mariñas do Grupo EPhysLab da Universidade de Vigo.
Diante dun futuro incerto polo cambio climático no que as vagas de calor serán, desgraciadamente, protagonistas, o seu impacto nos ecosistemas aínda é dunha imprevisión máis que evidente; máis o futuro non se albisca moi tranquilizador a non longo prazo de tempo e cheo, pola contra, de interrogantes e inquedanzas para moitas actividades económicas que teñen que ver co marisqueo de bivalvos nas rías galegas.
Os Lombos do Ulla centra a atención neste senso desde Carril (Vilagarcía) ata o concello de Rianxo , unha zona de grande importancia na produción de bivalvos, onde traballan 4.300 persoas que, en 2024 sumaron 40 millóns de euros.
Os puntos do interior da ría de Arousa son, segundo o promotor da investigación, moito máis problemáticos polas condicións térmicas ao seren menos profundos.
Entre 2025 e 2099 agárdanse 88 vagas de calor con tendencia a prolongarse máis no tempo (até 15 días con temperaturas medias de 35 graos). Unha previsión para nada
aceptable pensando no desenvolvemento deste importante sector extractivo na Galicia mariñeira.
