A sesión deste xoves 2 de abril da Comisión de Seguimento da Evolución do COVID-19 do Concello de Ribeira foi novamente unha fonte de novidades sobre a loita contra a pandemia despregada no termo municipal. Entre as cousas dadas a coñecer na reunión figuraba unha historia de solidariedade tecnolóxica: a implicación de dous voluntarios ribeirenses, Geni Lago e Alba Sieira, que veñen de poñer a disposición do Consistorio preto de 40 máscaras fabricadas por eles con impresoras 3D. Na sesión tamén se deu a coñecer a importante contribución do Motoclub Os Reventapistóns, cuxos integrantes veñen de doar diverso material sanitario, previa colecta entre os seus socios. No capítulo de accións solidarias tamén se destacou o labor de Carnicería Juana, por achegar produtos de alimentación; de Construccións AMC, que tamén cedeu material sanitario; e de Loida Fernández Troskita pola súa activa campaña de felicitación a través de Internet.
Así mesmo, informouse do reparto de alimentos mercados polo Concello en Cash Galicia con destino a Cáritas Parroquial (un reparto celebrado este mes xoves), e acordouse próximas entregas de máscaras a Gadis Hiper e de desinfectante ao 061.
